冇態紅鑽踢慣守勢波
亞冠盃分組賽東亞區E、F組今日拉開戰幔，F組頭場由澳職球隊西悉尼流浪者主場迎戰日職勁旅浦和紅鑽。西悉尼流浪者今季戰績平平，但紅鑽亦因日職未開咧，球員狀態未入局，而且紅鑽近年出戰亞冠盃踢法保守，今仗預計入波唔會多，首選中位數2.5球嘅細盤。
（Now 670及Fox Sports Play周二下午4時直播）
西悉尼流浪者上季喺澳職常規賽及季後賽都屈居阿德萊德聯之後攞到雙料亞軍，今季成績唔單止冇進步，反而有下滑之勢；上周末佢哋雖然喺打吡戰1比0擊敗榜首FC悉尼，打破對手今季聯賽不敗身，但實際佢哋已經落後對手23分，現階段仲要為季後賽資格努力，霸氣欠奉。西悉尼上次出戰亞冠盃係2015年，當時佢哋3場主場分組賽未贏過，結果分組賽只得第3被淘汰，今屆佢哋將主場比賽移師至新南威爾斯甘比爾鎮球場舉行，為免重蹈覆轍，預計亦唔會貿貿然搶攻。
紅鑽上屆8戰7細
浦和紅鑽上季喺日職總決賽都係做「阿二」，兩回合計因作客入球優惠輸畀鹿島鹿角，今季紅鑽由新潟天鵝簽入巴西攻擊中場拿費爾達施華，但融入需時，而且紅鑽上周喺日本超級盃再以2比3臣服喺鹿角腳下，明顯狀態仍未操起。紅鑽係上屆亞冠盃16強分子，由分組賽開始一共踢咗8場比賽，有7仗法定時間總入球都唔超過兩球，包括主、客兩鬥另一支澳職勁旅FC悉尼都冇失波，今次作客先求穩守亦係正常發揮，2.5球細盤開出機會高。