英超榜末比榜首鬥得更激烈，當中深受降班威脅嘅史雲斯先前兩度易帥，而上月上任就取得英超每月最佳領隊嘅保羅基文迪，被視為「天鵝」救世主，佢同助教馬基列尼都效力過車路士，今晚帶領史雲斯作客倒戈，可發揮「無間道」作用。車路士讓球半、兩球略嫌過火，樂比睇好史雲斯下盤。
（Now 621及LeSports HK應用程式周六晚11時直播）
本周英超最轟動消息，絕對係李斯特城辭退領隊雲尼亞里，雖然好多人替呢位功勳領隊抱不平，但英超作為一盤大生意就係咁現實，當你錢又使咗，成績又唔符合預期，作為老闆仲可以做乜？更換領隊往往能喺短期內發揮作用，問題係搵唔搵到適合人選啫。史雲斯就可以用獨具慧眼嚟形容，上月搵嚟名氣唔算大嘅保羅基文迪執教，佢領軍6場聯賽就贏咗4場，令史雲斯暫時起死回生。
史雲斯搵啱保羅基文迪
保羅基文迪10歲喪父，而佢爸爸就係鼎鼎大名嘅前英格蘭國腳基文迪，保羅自知唔係踢波材料，所以23歲就轉任教練，第一份工就係做車路士青年軍教頭，之後同多位車仔領隊合作過，一直由助教升到第2把交椅，並得到當時領隊安察洛堤賞識，其後帶佢到巴黎聖日耳門、皇馬及拜仁擔任左右手，呢段經歷令保羅基文迪變得更強更全面。
保羅基文迪上任史雲斯後，陣容亦作出調整，羅致馬田奧臣穩固後防，中前場則補充盧斯安奴拿辛格及湯卡路爾，幾位新球員暫時亦證明啱使，而曾被譽為英超史上最強防中嘅助教馬基列尼，則集中加強防守力，令史雲斯防線不斷進步，穩定性提升，上仗鬥李斯特城終於保持清白之身。
藍戰士讓得過火博下盤
當然以史雲斯現時嘅實力，同榜首車路士仲有段距離，但佢哋近期能夠擊敗利物浦、修咸頓，僅負曼城1球都顯示出不俗能力及良好精神面貌，即使強如車路士都未必可以話炒就炒，以目前盤口球半、兩球計，輸3球先輸晒成個盤，下盤確實值博。