費倫巴治盤口硬淨有料到
今日除咗有慣常嘅歐聯同亞冠畀大家玩之外，亦忽然插咗3場歐霸32強次回合，推介場次係土超勁旅費倫巴治主場對俄超球隊卡斯洛達。費倫巴治首回合落後1粒要絕地反擊，莊家開到讓半一咁多兼企硬，盤口顯示信心十足，上盤值得入貨。
（Now FoxSports Play周四凌晨1時直播）
地獄主場嚇窒卡斯洛達
以往獎金奀而唔受重視嘅歐霸，經常出現強隊Hea踢甚至唔想要嘅情況，戰意難料下好難投注，但自從上屆改制為冠軍可取得「金礦」歐聯入場券後，大大提升各球隊嘅爭勝意欲，蠱惑嘢亦少咗好多。上屆西維爾同利物浦會師決賽，最終西軍連續3屆封王堅係正路。講番今屆歐霸，上周中展開嘅32強首回合，除咗熱刺爆冷輸波外，曼聯、史浩克04、羅馬及里昂等勁旅都贏到開巷，大熱門曼聯更主場大炒聖伊天3粒，可見歐霸盃喺一眾強隊心目中嘅地位唔同晒。
肥叔今晚就睇中費倫巴治主場對卡斯洛達呢場，首回合卡斯洛達領先1比0，費倫巴治想出線今仗一定要贏，決心唔使懷疑。況且土超球隊嘅「地獄球場」向來係作客球隊噩夢，加上俄超仲未歇完冬，卡斯洛達狀態唔慌好，想守住一粒優勢捱到完場真係唔易。睇埋初盤，莊家開出費倫巴治讓半一，查實都讓得幾辣，但一直企硬未轉半球盤，似乎莊家都幾睇好呢支土超勁旅可贏波贏盤晉級，肥叔從來係認盤唔認人，加上水位有2.07倍咁好分，不妨早啲入定呢個上盤。