另一場足總盃16強賽事，狀態復甦嘅英超勁旅曼城，今晚作客鬥英冠前列分子哈特斯菲爾德。曼城挾4連勝兼攻入11球強勢，加上近期作客表現對辦連場大捷，包括對上2圈英足盃作客大炒兩支英超球隊韋斯咸同水晶宮，今仗面對次級球隊勝算極高，「讓球客勝」放心捧場。
（Le Sports HK周六晚11時直播）
曼城近期全面回勇，雖然人氣新星加比爾捷西斯上仗勇戰受傷要長抖，不過曼城仲有大把球星頂上，好似近期被貶後備嘅阿古路就要踢爭氣波，佢同史達寧、利萊辛尼、奇雲迪布尼等向來合作無間，火力唔需要擔心。再者，曼城近7仗作客贏5仗，5仗都係贏2球或以上，球員信心爆棚。
哈特斯菲爾德唔想重賽
哈特斯菲爾德對上2圈英足盃對手只係英甲球隊羅奇代爾同維爾港，晉級過程未受考驗，反而上仗聯賽作客險勝洛達咸後，依家排英冠第4位，有力爭取英超升班資格，球隊目標肯定係升班多過英足盃，今仗只求盡快了結，絕對唔會死守博重賽，主場諗住搶攻隨時輸得仲甘。