今晚意甲國際米蘭主場對安玻里，大家提防中伏，因為國米首席射手莫路伊卡迪、次席射手比列錫一齊停賽，都唔知搵邊個入波，國米主W仲熱爆1.25倍，明顯受到高估唔值博。至於安玻里11場聯賽作客僅入6球，好難威脅對手大門，最好揀入球細。（TVB 302周日晚10時直播）
國際米蘭上仗大戰輸畀祖雲達斯之餘，莫路伊卡迪同比列錫都因為侮辱球證，雙雙被罰停賽。兩人今季意甲合共為國米轟入22球，佔球隊聯賽總入球60%，一齊缺陣影響有幾大可想而知。同埋包括意盃不敵拉素在內，國米已經2連敗，狀態有走下坡迹象，今場就算贏，估計都係小勝居多。
安玻里作客縮住踢
安玻里11場聯賽作客，竟然有8場入唔到波，但亦好少大敗，其中作客拿玻里，都係僅輸0比2。加上安玻里自知難以擊國米，相信今仗會死守博1分，國米就更加難入波，入球細有2.05倍抵玩。