你話日超盃緊要定亞冠盃緊要？呢個問題有啲多餘，因為邊隊波都會揀後者，所以今日橫濱日產球場上演嘅日超盃鹿島鹿角對浦和紅鑽，變數特別多，簡單啲玩個1.68倍浦和攞冠軍算數！
（周六下午12時35分開賽，馬會網上文字直播）
點解選擇玩冠軍彩池，理由係從上屆交手賽績，季前增兵幾樣去睇，鹿島應該秤高些少，但係初盤一出，歐洲唔少莊家將原本壓低些少嘅鹿島主W推高，個勝和負結構同足智彩浦和小讓平半嘅格局睇齊，即係話臨時轉軚，出現呢種異動，明顯反映有啲嘢係對日職衞冕冠軍鹿島不利，咁內裏有乜問題呢？絕對同實力冇太大關係。
鹿島射12碼輸多贏少
季前鹿島雖然走咗柴崎岳、後衞黃錫鎬等主力，但係簽番彭美拉斯中場李安度、神戶前鋒柏度祖尼亞、天鵝中場里奧施華、湘南「攻守發動機」三竿雄斗、全北門將權純泰幾個，前中後都有補強，表面睇左閘、龍門兩個弱位強化咗。浦和亦一樣，羅致咗天鵝鋒將拿費爾達施華、千葉安拿胡阿道，前鋒衝擊力、制空力都提高晒，「橫濱水手守護神」榎本哲也嘅加盟，更為龍門西川周作搵到個好副手。
不過大家仔細啲睇吓就明，兩隊嘅增兵都係基於原有班底加強板櫈深度，作戰實力提升唔叫得脫胎換骨，佢哋咁做完全為咗配合日本足協、日職聯賽會提出嘅「絕對突破」亞冠策略，希望響亞洲舞台威番鋪，打破日本將近10年嘅亞冠錦標荒。事實喺日超盃之後3日，浦和就要喺亞冠作客西悉尼流浪者、鹿島就主場鬥蔚山現代，對手都係硬嘢，唔輪到佢兩隊唔就住。
由於有亞冠顧慮，鹿島、浦和喺呢個類似英格蘭社區盾性質嘅日超盃，未必會去到盡，肯唔肯出足人都係疑問。因為咁，倒不如玩冠軍賠率博鋪大細，事關浦和響日產球場打波15戰取得9勝，鹿島就15戰得6勝，橫濱呢個場旺浦和些少，加埋佢哋季季都係有頭威冇尾陣，頭威頭勢實搏啲。而且鹿島今日多數倚重上季坐多過踢嘅曾端準把關，後防存在風險，尤其佢哋喺日超盃4次射12碼輸咗3次，即係場波和親都牙煙，與其博受讓嘅佢哋，倒不如玩浦和冠軍，起碼好分過中鹿島半格下盤。