猛將如雲勒唔住
今季喺澳職一支獨秀嘅FC悉尼，近2場同爭標對手墨爾本勝利以及布里斯班獅吼正面對撼，結果攞到1勝1和，榜首優勢拉開到有成9分咁多，常規賽冠軍似乎指日可待。依家FC悉尼個勢勒都勒唔住，唔單只正選嗰班球員實力超班，就連班後備都着晒火，今日主場迎戰實力低兩班嘅威靈頓鳳凰，就算鳳凰曉飛都係咁話喇，「讓球主客和」FC悉尼讓一球，直取讓球主勝啦！
（有線64及203台周四下午4時50分直播）
其實FC悉尼今季之所以咁標青，同佢哋人腳表現平均不無關係，除咗前鋒保斯基、保保同荷洛斯高都交足功課外，就連踢中堅嘅保積斯都一樣咁掂，佢唔單止防守穩健，上場仲幾乎憑罰球建功，功架十足。同時，一班後備兵都有水準，其中艾賓尼伊斯爾同埋戴夫卡尼近期分別做過贏波英雄，證明第二梯隊實力強勁，加埋呢場波主場出擊，亦係信心保證。
教練艾諾豪言不敗封王
FC悉尼現時喺聯賽18場不敗，早前教練艾諾仲表明，要爭取全季不敗封王，兼且要破澳職最高得分紀錄，勁豪氣。為達成目標，餘下賽事一定唔可以有絲毫鬆懈。
相對於FC悉尼領先一大截，威靈頓鳳凰依家只係排第8，雖然話同第6位、可以殺入季後賽嘅席位只係相隔2位，但球隊近3場只得1分，狀態差勁，試問又點爭分從後趕上？上年底加盟嘅老將前鋒史美斯，上場攞到回歸後第1球，以為打破入球荒後會越戰越勇，點知佢老哥入波之後竟然做咗「紅牌阿姑」！真係「一念天堂 一念地獄」！今日作客「一哥」，鳳凰就連主力前鋒都要坐波監，咁仲邊度有運行？