「5張嘢」三浦知良有心有力
今日有一場波值得留意，日本「新年盃」熱身賽，兩支日乙球隊喺中立場宮崎綜合運動場交手，長崎成功丸對FC橫濱！表面上戲碼一般，但卻成為網上熱話，因為將於本月26日踏入50歲嘅三浦知良未言退，上仗更正選上陣，協助球隊擊敗日職勁旅鹿島鹿角，果然寶刀未老，今場有力贏埋長崎成功丸，捧FC橫濱客勝。
（周一早上10時開賽、馬會網上文字直播）
三浦知良上月同FC橫濱續約1年，如無意外可以打破由已故英格蘭名宿馬菲士保持嘅50歲零55日最大年齡職業球員紀錄。呢位日本長青樹養生有道，上季日乙都有2球進帳，佢講明要繼續刷新自己保持嘅日本聯賽最老球員入波紀錄，鬥心十足。
成功丸2戰捧蛋難靠
上仗「新年盃」，三浦知良正選踢咗45分鐘，幫球隊以1比0擊敗鹿島鹿角，2戰2勝，成為4支參賽球隊中，唯一全勝之師。可見唔止三浦知良有心有力，FC橫濱全隊狀態亦相當弗。反觀長崎成功丸2戰2敗，共吞6蛋，包括上仗以0比4慘敗畀福岡黃蜂，更加鬥唔過大勇嘅FC橫濱。
另一場「新年盃」由鹿島鹿角對福岡黃蜂，雙方近5次碰頭，鹿角獲得全勝，但考慮到今場屬於熱身賽，兩隊都會踢得比較放，揀入球大。
（周一下午1時開賽、馬會網上文字直播）