非洲國家盃終於來到決賽，埃及大戰喀麥隆！埃及堪稱「非洲王中王」，曾7捧非國盃冠軍，屬各隊之冠，而且近4次進身決賽都奪標而回，包括9年前擊敗喀麥隆。「不屈雄獅」喀麥隆今屆有多位主力拒絕徵召，以二線兵為骨幹，能走到最後階段已算超額完成，今仗恐怕難敵埃及，宜直接揀1.8倍埃及「冠軍」。（TVB 303周一凌晨3時直播）
埃及喺非國盃戰績輝煌，總共7次捧盃，其中2010年更成就3連冠，雖然過去3屆都入唔到決賽周，不過呢支「非洲王中王」今屆捲土重來，即進身終極之戰，可見佢哋踢呢項大賽的確有計。除咗「天命」旺埃及之外，佢哋陣中亦有唔少猛將，最具名氣必數「埃及美斯」穆罕默德沙拿，呢位羅馬前鋒能傳擅射，上仗4強靠佢入波先開紀錄，另有史篤城中場拉馬丹索希、侯城後衞艾穆罕默迪。美中不足係阿仙奴中場艾利尼有傷，難以上陣。
埃及仲有一位幸運福星助陣，就係44歲門將艾哈達里，球隊前4次捧盃，佢都有份參賽。今屆4強同布基納法索互射12碼，艾哈達里撲出2球，成為晉級大功臣。如果今場決賽又要互射12碼，艾哈達里又可以大顯身手，埃及有着數。
人腳經驗贏晒
喀麥隆今屆非國盃展開前，發生「逃兵潮」，包括利物浦後衞祖爾麥迪比在內7位效力歐洲球會嘅主力，都拒絕入伍參賽。球隊今屆5場比賽，法定時間90分鐘只贏2場，雖然最後都打入決賽，但欠缺說服力。論人腳質素、大賽經驗，以至歷史往績，喀麥隆都處於下風，點睇都係埃及較有冠軍相。