3主力復出踢館
周一雖然得9場波，但阿King一樣搵到好嘢，就係西甲獨腳戲艾拉維斯主場對西維爾。艾拉維斯近況反覆，加上陣中有3名球員要停賽，嚴重影響球隊實力，對住近5仗贏晒狀態甚勇嘅西維爾，相信都係冇運行，西維爾客Ｗ有1.79倍值得支持。
（Now 632周二凌晨3時45分直播）
艾拉維斯上仗1比2不敵CF格蘭納達，仲有中場卡泰爾以及中堅阿歷西斯領紅被逐，連埋累積5面黃牌的中場丹尼爾托利斯，3人今場都要停賽，縱有上仗停賽嘅後衞文奴加西亞、拿古亞迪亞以及中場馬高斯洛蘭迪復出，但球隊陣容依然不整。
艾拉維斯遇強即屈
艾拉維斯今季西甲只係贏過3場主場賽事，迎戰榜首雙雄巴塞隆拿同皇家馬德里都遭逢慘敗，今仗面對另一支前列分子西維爾，相信都係冇運行。
西維爾最近5場賽事贏晒近況甚勇，而且最近2場作客都順利攞足3分，可見球隊狀態好好。由於巴塞同皇馬今輪聯賽都贏波，令西維爾現時落後榜首嘅巴塞5分、次席嘅皇馬4分，如果要保持爭標希望，今仗絕對不容有失。西維爾今場有多名主力復出，包括上周四聯賽對畢爾包停賽嘅中場沙拉比亞、尼桑斯以及守將巴里查，人強馬壯下出征艾拉維斯，絕對有力反客為主，阿King捧客勝。
俄超安治未執掂捧對家
其餘推介，俄超安治歇冬期大換血，羅致了25名新兵同時有17名球員離隊，球隊熱身賽表現飄忽，睇嚟有排執。魯賓卡山近6仗5勝1和狀態唔曳，就算有後衞拿比奧連停賽，今仗都可輕取安治，上盤可取。
（周二凌晨零時30分開賽、馬會網上文字直播）
最後係智甲秋賽事，奧希金斯主場7連勝係明顯「地頭蟲」，面對近8仗客戰輸7場嘅康塞普森大學，應可輕鬆贏波，奧希金斯讓半一捧上盤。
（周二早上7時30分開賽、馬會網上文字直播）