今晚英格蘭足總盃8強戰，英超「2哥」熱刺主場對越級挑戰嘅英甲仔米禾爾。熱刺王牌射手哈利卡尼腳風超順，喺近3仗本土賽事狂轟8粒，包括上圈足總盃「戴帽」，弗到冇朋友，挾本土賽事主場11連勝氣勢可「依絲W」，但主W賠率太乏味，轉捧3.5球中位數入球大好過。
（LeSports HK應用程式周日晚10時直播）
哈利仔近3本土賽入8粒
熱刺雖然先後喺歐聯及歐霸「畢業」，但反而有利佢哋專注本土賽事，尤其係喺白鹿徑主場出擊零舍醒，近11仗本土賽事主場贏晒，若果單計近5仗主場亦攻入16球，當中有4仗總入球皆至少有4粒，同射手哈利卡尼（圖）腳風奇順大有關係。聯賽連足總盃在內，「哈利仔」喺近3仗本土賽事入咗8粒，包括兩次大演帽子戲法，上圈足總盃大勝富咸3比0之役連中三元，而好拍檔迪利阿里亦連續2仗有士哥，連同基斯甸艾歷臣嘅後上支援，火力強橫。米禾爾只係英甲上游分子，同比佢哋高兩級嘅熱刺差天共地，仲有首席門將佐敦艾查繼續因傷缺陣，今仗實在凶多吉少，不過主W得嗰1.07倍完全冇肉食，既然熱刺火力全開，寧轉玩大盤。