今日有近百場波，難免會花多眼亂，等我阿King幫大家搵好嘢喇。是日重心推介場次，係西甲尾場CF格蘭納達主場硬撼馬德里體育會。馬體會下周中有歐聯跟尾，今仗未必會搏盡，加上CF格蘭納達一向靠主場搵食，力爭搶分護級戰意秤先，受讓必捧讓球主勝。
（Now 632周日凌晨3時45分直播）
老實講，馬體會都需要為保前4歐聯席位搶分，但始終歐聯16強次回合主場對利華古遜於下周中燒到埋身，點都緊要啲，眼見巴塞喺歐聯首回合落後0:4之下，喺剛周中次回合贏番6:1大逆轉晉級，就算「床單兵團」首回合贏利華4:2亦唔敢大意，連「王子」費蘭度托利斯都話巴塞反勝提醒咗佢哋，一日球證未吹雞完場都唔好咁老定，各人嘅心思明顯已飛晒去下周中嘅歐聯，今仗對CF格蘭納達相對冇咁重要，主帥施蒙尼留力唔奇。
戰意贏馬體會一條街
未踢今輪之前，CF格蘭納達仍排緊尾3，落後「安全區」尾4嘅拉科魯尼亞5分，必定搏命為護級搶分。但話說回頭，CF格蘭納達歇冬後略有起色，尤其係於冬窗買入嘅箭頭阿祖安拉莫斯極速融入，並帶動到球隊嘅進攻，加上今仗有守將烏捷艾保及加斯頓施華刑滿復出，挾主場3連勝氣勢，絕對唔赦心不在焉嘅馬體會，仲有得受讓咁筍，讓球主勝有買趁早。
串熱拿亞大唐迪拉細
同時間意甲有熱拿亞市打吡戰，由熱拿亞「掛名主場」對死敵森多利亞，由於兩軍傷疲盡起，每逢打吡戰佢哋都唔想輸一定打甩髀，近3次交手總入球皆至少有3粒，一於捧大盤。
（TVB 302周日凌晨3時45分直播）
最後係葡超唐迪拉主場硬撼勁旅士砵亭，唐迪拉近8仗聯賽有6仗食白果，而士砵亭近期攻力略見下滑，轉捧入球細好過。
（有線155台周日凌晨4時30分直播）