另一場歐聯16強次回合，首回落後一球嘅德甲球隊多蒙特，回師主場迎戰葡超賓菲加。「蜜蜂兵團」近況甚勇，近3仗賽事贏晒兼轟入咗12球，今仗只要淨勝對手賓菲加兩球或以上就可以出線，以佢哋近期嘅火熱狀態，面對近3次歐聯造訪德甲球隊全敗嘅賓菲加，讓球盤多蒙特讓一球／球半，阿謙推介1.83倍嘅上盤。
（有線62及202台周四凌晨3時45分直播）
「蜜蜂」3連勝勁入12球
「蜜蜂兵團」首回合作客以0比1不敵賓菲加，當中主力射手奧巴美揚射失12碼令球隊未能同對手打和。不過，呢位加蓬隊長好快重拾信心，喺上周對利華古遜及前周對弗賴堡嘅賽事都梅開二度助球隊大勝。多蒙特喺呢3場賽事合共攻入12球，球隊火力相當強勁，今仗贏1比0即博到加時再戰，淨勝2球或以上就可以晉級，就算有中場馬高列奧斯同馬里奧葛斯因傷缺陣，相信都阻止唔到「蜜蜂兵團」反撲嘅決心。
賓菲加首回合雖然靠希臘前鋒美度古嘅唯一入球擊敗多蒙特，但球隊有嚴重嘅「恐德症」，最近3次歐聯造訪德甲球隊都輸波而回，作客面對急欲收復失地嘅多蒙特狂轟狂炸，相信都係凶多吉少，「蜜蜂兵團」讓一球／球半都照捧上盤。