MSN合體踩油
巴塞隆拿近期大起大落，喺歐聯16強奇迹反勝殺入8強後，上星期聯賽竟然作客不敵拉科魯尼亞，將辛苦追嚟嘅榜首再次讓出，今晚巴塞回歸魯營球場迎戰華倫西亞，為保爭標機會肯定會施展渾身解數爭勝，觀乎巴塞近期主場近乎無敵嘅表現，今仗仍值得投信心一票，讓兩球都未驚過，照捧讓球主勝。
（Now 632周一凌晨3時45分直播）
巴塞喺西甲追趕皇家馬德里，一度踢出6連勝走勢，但係分心歐聯之下，上輪聯賽意外1比2輸畀拉科魯尼亞，成盤冷水照頭淋。巴塞依家落後榜首皇馬2分兼多踢1場，餘下賽事場場都當決賽踢，而且上仗因傷缺陣嘅尼馬應該可趕及復出，「MSN」組合重現自然畀到大家信心。事實上，巴塞隆拿喺魯營球場作戰向來係信心保證，球隊近12次主場出擊拎到11勝1和不敗佳績，包括上場歐聯「奇迹之戰」以6比1大炒巴黎聖日耳門，連埋呢場在內有9仗贏對手3球或以上，以巴塞隆拿主場氣勢同爭勝決心，今仗大勝可期。
作客嘅華倫西亞已逐步逃離降班漩渦，最主要原因係主場戰績提升，不過作客比賽仍然冇起色，近4仗作客1和3負，包括0比3輸畀馬德里體育會。華倫喺未有迫切降班威脅下，今仗戰意未必足夠，如果巴塞早開紀錄，好大機會上演大屠殺。
西維爾保前4頂住馬體會
另一場西甲，「4哥」馬德里體育會主場對「3哥」西維爾，兩隊上周中歐聯命運各異，馬體會晉級、西維爾出局，由於西維爾冇得再以歐霸冠軍身份踢歐聯，勢必全力保住前4，否則好難向球迷交代。西維爾近13場聯賽只係輸過1場，而且贏過皇馬，要擊敗佢哋相當困難，馬體會讓波之下，一於要西維爾讓球客勝。
（Now 632周日晚11時15分直播）