衝直升兼過一哥癮
今日係國際賽周前嘅星期一，二線波當道，阿King幫大家做功課，柏林聯主Ｗ最好路。呢支前東德大軍今季大展拳腳，現時排第2位，好大機會可以直接升班，雖然對紐倫堡往績一般，但挾主場4連勝威勢加上升班欲望，相信可克服往績嘅缺點，1.67倍主Ｗ值捧。
（周二凌晨3時15分開賽）
以往曾經有科特布斯、特雷斯登、羅斯托克及RB萊比錫等東德球會上到德甲，柏林聯有望成為另外一支擁有東德背景嘅球隊升班。今季柏林聯表現穩定，現時比多踢1場嘅史特加少2分，如果今仗順利贏波，就可以取代對方位置，今季首度升上榜首做「德乙一哥」。
柏林聯主場出擊，成為今仗絕對優勢，因為球隊已經錄得主場4連勝，如果畀其他球隊，主W肯定被壓至1.4倍或以下，現時主Ｗ仲有1.67倍，全因柏林聯近6次對紐倫堡只得1和5負成績所致，但現時柏林聯氣勢正盛，贏波仲可以刷新球會主場連勝紀錄，一於跟紅頂白。
法乙歐塞爾「細」頂斯特拉斯堡
至於法乙歐塞爾主場對斯特拉斯堡，歐軍5仗不勝而斯特拉斯堡剛大炒對手，兩隊近4次交手3次開細，再追。最後阿甲沙蘭迪兵工廠主場對拉費爾拿，客軍依家喺阿甲降班區包尾，而且球隊對上15場聯賽作客輸咗11場，平手盤揀擁有主場之利嘅沙蘭迪兵工廠。