今晚賽事唔多，但阿King一樣搵到好嘢，心水推介場次係熱身賽捷克主場對立陶宛。捷克雖然處於新舊交替時期，好彩以柏德列舒希克為首嘅新星嶄露頭角，今仗主場出戰實力平平嘅立陶宛，係時候騷吓哥利，證明自己有力接班，1.87倍嘅讓球主勝可作過關重心。
（周四凌晨1時開賽）
隨住施治等老將退出國家隊，捷克正處於新舊交替嘅尷尬時期，現時中前場以「90後」嘅新星為主，其中柏德列舒希克最為突出，呢位森多利亞前鋒今季喺意甲表現醒神，單計聯賽已有7個「士哥」，與同樣於意甲搵食嘅卡雷斯及積及贊圖，成為捷克新一代接班人，再配合中場核心達列達，實力不容小覷。世界排名第107位嘅立陶宛，只係以「土炮」為主，實力同捷克差成條街，加上近6次正面交鋒，捷克錄得5勝1負，明顯格食格喇，柏德列舒希克等新星為博上位，遇弱仲唔搏盡咩，一於捧讓球主勝。
蘇格蘭殘陣捱細界
另一場「拍跳」係蘇格蘭主場對加拿大，蘇軍今次有格蘭漢尼及占士摩利臣等受傷，前者已經退隊，由於嚟緊世盃外要迎戰斯洛文尼亞，預計主帥史特根今仗會收起占士摩利臣，費事喺呢類無關痛癢嘅比賽加重傷勢；加拿大有自知之明，作客環境必玩死守，唔慌多波入，細盤有計。（周四凌晨3時45分開賽）最後係聽朝巴省聯彭美拉斯主場對米拉索，雖然彭軍有杜度等主力被國家隊徵召，但米拉索近4仗輸咗3仗，造訪彭美拉斯難逃厄運，直取讓球主勝。
（周四早上7時30分開賽，馬會網上文字直播）