兩國交惡 打「虎」冇手軟
新一輪世盃外圍賽，由亞洲區第3圈A組「中韓大戰」中國主場對南韓揭開戰幔！由於中國不滿南韓部署薩德導彈防禦系統，導致兩國外交關係緊張，亦令今場比賽「升呢」至政治層面，勝負更關乎民族尊嚴，國足絕對唔可以失威，特意安排喺「不敗福地」長沙出擊，配合主帥納比意式布防，有力頂住「太極虎」，捧受讓嘅中國1.62倍讓球主勝。
（Now 671及FoxSports Play周四晚7時35分直播）
納比擅於處理逆境
國足喺A組5戰未贏過僅有2分，內地傳媒計過數，餘下5場必須要拎13分至有機會攞到附加賽資格，換言之今場一定唔可以輸。國足專登安排喺「不敗福地」長沙踢今場生死戰，原來國足自2005年開始，8次喺長沙踢國際A級賽事，取得4勝4和，對手包括哥斯達黎加及巴拉圭等球隊，希望用呢個輝煌戰績去提升球員信心。
國足另一大殺着當然係主教練納比，呢位名帥見慣大場面，2006年率領意大利克服意甲假波醜聞影響，勇奪當屆世盃冠軍，就知佢處理逆境有一手。同埋納比精通意式防守，上一輪外圍賽0比0和卡塔爾，就令對手苦無入波機會。今仗對手南韓實力更強，相信納比會加緊布防，再謀突擊。
孫興民停賽 南韓攻力削
南韓受到傷停問題困擾，最大鑊係效力熱刺嘅孫興民停賽，攻力絕對受削。中場核心李在成及後防支柱郭泰輝受傷冇入選，換言之前中後都有主力缺陣。史雲斯中場奇誠庸剛傷愈冇耐，狀態成疑。此消彼長下「太極虎」未必有太大優勢。而且南韓現時高踞小組次席，出線機會樂觀，搶分迫切性唔及國足，最緊要順利回國，讓波有暗湧。