國際賽過後，聽朝焦點落喺巴西聖保羅省聯賽身上，事關賽事來到最後1輪分組賽，4組共8個出線名額之中，已經有7個名花有主，餘下最後1個出線席位，屬於A組保地花高SP同伊圖諾之爭；保地花高SP形勢較好，今仗主場只要打和費路維拉亞就可以晉級8強，肯定特別小心謹慎，甚至會主守求和博1分，阿King首選入球細。
（周四早上8時45分開賽）
保地花高SP雖然係丙組仔，但防守穩健，近4場取得1勝3和，每場總入球都係2球或以下，包括打和巴甲勁旅聖保羅1比1，可見保地花高SP一旦有心屯重兵死守，要攻破佢哋大門亦相當困難。保地花高SP現時領先同組第3位伊圖諾3分，換言之今場和波即可出線，梗係要好好利用本身防守強項，悶死對手。至於費路維拉亞只係非聯賽球隊，實力弱一截，加上已經篤定出局，更加唔會搏命，相信難以威脅保地花高SP防線，捧入球細啱數。
伊圖諾豁出去捧Ｗ
另一場，伊圖諾除咗必須要喺主場擊敗巴西紅牛之外，仲要寄望保地花高SP輸波，先至可以出線，不過仍相信伊圖諾會盡最後努力爭勝，加上球隊近3次對巴西紅牛獲得全勝，主W值得再追。最後推介哥連泰斯主場對利倫斯，包括盃賽在內，哥連泰斯近8場比賽，每場總入球都係2球或以下，入球細好路。