仇家見面去到盡
今晚意甲上演重頭戲，第3位拿玻里主場大戰榜首祖雲達斯，拿玻里落後祖記10分，如果今場贏唔到，基本上唔使旨意爭標，肯定豁出去一搏。祖雲達斯兩位射手希古恩、文迪蘇傑早前獲國家隊提早放人歸隊，擺明搏殺，兩軍劍拔弩張，中位數2.5球嘅入球大，有2倍抵玩。
（TVB 302周一凌晨2時45分直播）
無可否認，雙方近年碰頭，拿玻里處於劣勢，過去6次鬥祖記，輸咗5次，僅贏得1次，但要留意其中4場敗仗係作客，包括3月初意大盃4強首回合輸1比3。不過，睇番拿玻里近6次主場對祖雲達斯，獲得3勝2和1負，並唔輸蝕。成績之所以有咁大差別，皆因拿玻里傳統上屬於意國南方足球icon，當地球迷對北方代表祖記特別敵視，所以拿玻里喺自己地頭出擊，絕對唔衰得，屆時應該會主動搶攻。
事實上，拿玻里係今季意甲攻力最強球隊，29場聯賽轟入68球，比「斑馬兵團」多9球，其中梅頓斯、恩斯治尼、咸錫加埋就貢獻咗42球，可見呢個進攻「鐵三角」絕對唔嘢小。
祖記雙箭蓄銳搏殺
祖雲達斯方面，前鋒希古恩上場世界盃外圍賽停賽，令佢可以提早歸隊，呢位阿根廷射手2次倒戈鬥拿玻里，都取得入球，證明佢對舊主，完全唔客氣。拍檔文迪蘇傑亦獲克羅地亞體諒，唔使踢上場熱身賽，兩人有充裕時間休息，唔怕同主隊駁火。兩隊近6次對壘，有5次總入球係3球或以上，有望再演入球騷。