落後拉素2粒次回合焗攻
意大利盃4強次回合上演「首都打吡」，羅馬主場對拉素，首回合拉贏2比0，兼打破之前連續4次打吡戰輸波嘅宿命，信心返晒嚟。羅馬為收復失地，必須盡快入波，應會搶攻，豁出去一搏。加上雙方射手迪斯高、恩莫比尼大勇，預料會有激鬥，中位數2.5/3球照捧入球大。
（周三凌晨2時45分開賽）
羅馬已經喺歐霸盃出局，聯賽亦難以超前祖雲達斯，今季最大捧盃希望得番意大利盃，肯定全力出擊，而且對手仲係同市死敵拉素，羅馬更加唔會退讓。唔講唔知，羅馬原來係意盃史上入決賽次數最多嘅球隊，達到17次，絕對唔可以排除今仗反勝嘅可能性。
迪斯高恩莫比尼鬥數胡
事實上，羅馬攻力強橫，前鋒迪斯高上仗意甲梅開二度，佢今季聯賽已轟入23球，連埋盃賽總共射入33球，成為羅馬史上單季入波最多嘅球員，非常犀利。不過，防中迪羅斯早前為意大利踢國際賽時受傷，佢缺陣之下，削弱中場攔截力。同埋羅馬近6場主場有5場有失波，恐怕今場難保持清白之身。
拉素勇態持續，近10場比賽取得8勝2和，包括意盃8強作客以2比1擊敗國際米蘭。拉素前鋒恩莫比尼腳風非常順，除咗聯賽已有18球進帳之外，今屆意盃3戰亦入2球，其中4強首回合對羅馬，攻入1球。恩莫比尼早前為意大利踢世界盃外圍賽對阿爾巴尼亞，都頂入靚波，勒都勒唔住。羅馬焗攻之下，防線應會出現更多空位，讓恩莫比尼有機可乘，有利製造大比數賽果。