明早舉行嘅南美超級盃首回合，南球盃盟主查比高恩斯主場對自由盃冠軍國民體育會，值得留意。兩隊係上屆南球盃決賽隊伍，但因為發生空難悲劇，導致查比高恩斯大部分球員身亡，國體會因而將南球盃錦標讓予查軍，令兩隊建立深厚友誼。加上南超盃只屬象徵性質，令今場更具表演味道，相信雙方都放開懷抱，享受快樂進攻足球，首選入球大。
（周三早上6時15分開賽）
巴西球隊查比高恩斯自空難之後，獲得各方友會幫助，迅速完成重建，球員大踢爭氣波，表現愈來愈好，上月中開始近5場州聯賽全勝，共攻入18球，逐漸走出悲劇陰霾。由於今仗對上屆南球盃決賽對手國民體育會，意義重大，球隊上下都希望踢場好波，幫過身隊友踢完「未完嘅比賽」。
國民體育會專重對手唔會放水
哥倫比亞勁旅國民體育會上年除咗打入南球盃決賽之外，亦奪得上屆自由盃冠軍，實力凌駕查比高恩斯。至於國體會讓咗南球盃冠軍畀查比高恩斯之後，今場會唔會又放水呢？咁又未必，因為上得球場比賽，只有出盡全力爭勝，先至係真正尊重對手，所以國體會應會出真功夫，同查比高恩斯駁火。