英超今晚仲有場「倫敦打吡」，志切踢爭氣波嘅阿仙奴主場迎戰「錘仔幫」韋斯咸，兩隊近期形勢稱得上水深火熱，主帥雲格同比歷都有下台危機，今仗肯定希望踩住對手反彈，睇番兩隊近年交鋒例牌多波入，今仗駁火機會高，中位數2.5嘅入球大係不二之選。
（Now 622及LeSports HK應用程式周四凌晨2時45分直播）
阿仙奴近6場聯賽只係拎得4分跌到落第6位，要入前4嘅話真係唔可以再頹落去，球隊上仗同曼城激戰踢成2比2，睇到球員有番啲火想踢爭氣波，奧斯爾復出表現活躍，加上阿歷斯山齊士為首嘅多支大炮，火力唔講得笑。可惜阿仙奴防線漏洞極多，後防核心哥斯尼上仗仲要傷埋，想保持不失有一定難度。
近年碰頭多演入球騷
韋斯咸自皮耶喺冬季轉會窗離隊後，有蘭仙尼、阿休、辛迪加斯等分擔進攻，火力並冇減弱，只係後防同樣唔掂先至搞到連輸4場，現時只係多尾3嘅侯城6分，護級未穩陣，今仗作客冇得死守。兩軍近年碰頭均火花四濺，單計近10次聯賽交手，雙方共炮製41個士哥，當中有9仗總入球達3球或以上，再演入球騷唔奇。