大把在手受讓堅筍
意大利盃今晚續演4強次回合賽事，由拿玻里主場迎戰祖雲達斯。首回合領先3比1嘅祖雲達斯，今仗只要唔輸多過1球就可以進身決賽，兩隊數日前先喺同一地點相遇，當時打成1比1平手。祖雲達斯近7仗作客都未輸過，今晚再對拿玻里有望全身而退，阿King推介祖雲達斯讓球客勝。
（周四凌晨2時45分開賽）
首回合祖記憑射手保羅戴巴拿梅開二度，主場贏拿玻里3比1，呢位阿根廷前鋒喺周日晚聯賽對拿玻里只列後備，擺明留力今晚搏殺。雖然祖雲達斯作客較為保守，而且意盃會派部分副選上陣，但前線主力希古恩同文迪蘇傑近況都唔差，相信主帥阿里基會盡遣3人上陣，務求盡快取得入球，粉碎拿玻里嘅晉級意欲。
拿玻里喺意大利盃同樣鍾意用副選球員，後防更由兩位老將，34歲嘅門將連拿同31歲嘅中堅艾比奧爾領軍，穩健程度令人擔心。拿玻里近期表現亦反覆，近7仗只得3勝1和3負，當中主場更曾不敵中游球隊阿特蘭大，可見佢哋去到季尾狀態未能保持，今仗面對「大把喺手」嘅祖雲達斯，就算有荷西卡利祖、恩斯治尼同米利克在陣，都未必輕易攞到入球，祖記有得受讓咁筍，推介讓球客勝。
阿夫朗甚「大」難臨頭
另外講多兩場法足盃8強，法甲排第6嘅波爾多雖然近兩場作客輸晒，但對手分別係前列嘅尼斯同摩納哥，今仗對手只係排12嘅昂熱，平手盤捧客軍波爾多。（TVB 302周四凌晨零時30分直播）而法丙球隊阿夫朗甚實力同巴黎聖日耳門差一條街，隨時上演大屠殺，入球大細中位數3.5球都照捧大盤。
（TVB 303周四凌晨3時05分直播）