主場遇強有靚績保證
今晚續有英超快車，更爆發「雙藍會」，由「1哥」車路士主場惡鬥「藍月亮」曼城。車仔上仗意外輸波，為保爭標優勢不容再失，而且佢哋主場面對前列球隊非常Sharp醒，王牌夏薩特更明言留隊大派定心丸，面對遇強例腳軟嘅「藍月亮」，有力贏波重上正軌，2.25倍主勝有計。
（Now 621及LeSports HK應用程式周四凌晨3時直播）
車路士上仗意外反輸畀水晶宮1比2，聯賽主場10連勝斷纜，依家比「2哥」熱刺多7分，雖然優勢明顯，但若果再好似上仗咁輕敵輸波，唔單止打擊球員信心，隨時畀表現堅穩定嘅熱刺愈追愈近，到時臨尾香就真係自己攞嚟。為免夜長夢多，今仗遇強敵曼城必以贏波3分為目標。車仔比其他爭標勁敵優勝之處，除咗甚少喺弱旅身上失分之外，佢哋喺主場遇強愈強，自季初喺聯賽以1比2不敵利物浦，車仔近4次喺史丹福橋球場面對Big 6球隊，包括於聯賽及英足盃兩鬥曼聯，聯賽迎戰兩大倫敦宿敵熱刺及阿仙奴全部贏晒，認真有保證。
車仔王牌夏薩特一直受到西甲豪門皇馬垂青，但上仗輸畀水晶宮後，佢立即向外界回應轉會傳聞，話自己喺車仔好開心，希望留到2020年滿約為止，近日更有指車仔想同佢續約至2022年添，呢位進攻核心喺大戰前夕講到明唔走，絕對有助穩定軍心。
曼城客戰硬嘢例腳軟
相比之下，曼城今季作客可謂欺善怕惡，雖然上仗賽和阿仙奴2比2，但之前4次作客前7名球隊，包括聯賽鬥愛華頓、利物浦及熱刺，以及英聯盃作客鬥曼聯全部輸晒，睇嚟踢親硬仗例腳軟。主帥哥迪奧拿戰術過於重攻輕守，以首循環主場對車仔為例，領先1粒大好形勢下竟然下半場連失3球反輸1比3，後防線無論史東斯或高拉洛夫都畀人遲鈍及論盡之感，今仗造訪急欲反彈嘅車仔，實在凶多吉少，2.25倍主勝有計。