魔粉詐型 寸王要補鑊
英超聯賽連續20場不敗，都未必一定拎到前4架，講緊嘅咪就係曼聯囉！暫時以29戰得54分排喺聯賽榜第6位嘅紅魔鬼，今晚將會作客包尾大幡新特蘭。相信「寸王」莫連奴一定會落晒柯打，叫班曼聯球星今晚醒醒定定，做番場好戲畀大家睇，以挽回面子，預料半場就可大勝對手，半場客勝絕對係信心之選！
（Now 621及LeSports HK應用程式周日晚8時30分直播)
曼聯上輪聯賽主場憑停賽復出嘅瑞典射手伊巴謙莫域補時階段射入12碼，以1比1逼和愛華頓，再次失分而回，班紅魔迷唔失望就假啦！更有部分球迷不滿門將迪基亞未能救出菲臘積基爾卡嘅入球，甚至癲到將輸波歸咎佢嘅新髮型，真係賴得就賴呀！賽後「寸王」都不得不承認，少踢一場嘅紅魔鬼落後第4位嘅曼城4分，要爭奪歐聯入場券愈嚟愈難，如果球隊傷兵情況未有改善，可能會將今季餘下目標轉移至歐霸！不過，佢哋今晚對手只係魚腩球隊新特蘭，相信贏波冇難度！
6戰零入球 新特蘭打定輸數
另邊廂，開季至今30戰只得20分嘅新特蘭，上輪聯賽作客慘吞李斯特城兩蛋，領隊莫耶斯賽後都表現得非常絕望，似乎已經打定輸數！球隊暫時落後喺安全區嘅史雲斯8分，剩番8輪聯賽，要追都咪話唔難呀！而且，黑貓已經連續6場比賽未入過波，進攻無板斧，相信都幾難及時反彈。再加上，球隊今季聯賽主場得勝率只有20%，表現令人失望，今晚主場迎戰紅魔鬼輸少當贏，心水推介曼聯半場客勝！