米高盧特立教唔掂艾雷恩
今輪亞冠盃分組賽由西亞戰區率先登場，D組伊朗勁旅柏斯波利斯主場對卡塔爾球隊艾雷恩，最值得留意。第3位柏軍僅落後榜首艾雷恩2分，只要今仗贏波，就有機會做一哥，戰意肯定高昂。艾雷恩由米高盧特立執教，星味佔優，弊在呢位丹麥名宿踢波叻，教波就真係麻麻，寧願博柏斯波利斯主勝。
（Now Fox Sports Play周一晚10時30分直播）
由於每組只有頭兩隊可以出線，經過一半賽程後，D組兩個出線席位成為艾雷恩、希拉爾、柏斯波利斯之爭。艾雷恩狀態麻麻，近6場比賽只有2勝1和3負，作客更加兩連敗。球隊最有名氣嘅一定係主帥米高盧特立，但呢位52歲前丹麥國腳過往教波成績好曳，執教基達菲、莫斯科斯巴達、馬略卡、史雲斯、利卡維那，往往都係一季貨仔就執包袱。佢上年10月接手教艾雷恩，表現只屬一般，排卡塔爾聯賽第3位，早已無緣爭冠，下台壓力愈來愈大，恐怕又會成為過渡人物。
柏軍強勢主場8連勝
至於排第3位嘅柏斯波利斯形勢比較輸蝕，今場贏波就有機會榜首，但和波或輸波，將陷入出局邊緣，可以話係一念天堂、一念地獄，對柏軍而言，絕對係生死戰。幸好呢支伊朗球隊有地利支持，佢哋近8場主場全勝，食住呢股強勢Ｗ得。