希古恩升呢挑機美斯
今晚歐聯8強首回合上演2015年決賽翻版，祖雲達斯主場迎戰巴塞隆拿，兩年前巴塞喺柏林以3比1擊敗祖記，不過時移世易，今趟去都靈就冇咁易得手，因為祖雲達斯近21場歐洲賽主場錄得12勝9和不敗佳績，加上前鋒希古恩着晒狂入波，巴塞防中布斯基斯停賽下，連帶後防都要執位，恐怕招架唔住呢位前皇馬神鋒，平手盤祖雲達斯值博。
（有線61、64、201、203台周三凌晨2時45分直播）
祖雲達斯兩年前不敵巴塞後，中前場人腳出現好大變動，泰維斯、派路、保羅普巴、維達爾等人離隊，取而代之係希古恩、文迪蘇傑、基迪拉、保羅戴巴拿等猛將，前3者更加係「西甲通」，包括效力過皇馬嘅希古恩同基迪拉，熟悉巴塞底細，其中希古恩18次鬥「地上最強」，射入3球，雖然數字唔算標青，但呢位阿根廷國腳經多年磨練後，現已成為頂級射手，除咗上季以36球奪得意甲神射手之外，今季意甲亦已轟入21球，成為祖記近59年以來，第1位首季加盟就取得聯賽入波「20+」球員，腳風比巴塞同胞美斯更順。
祖記另一大優勢係聯賽已甩開主要競爭對手，可全力爭奪歐聯，佢哋今屆歐聯8戰獲得6勝2和，水準好平穩。反觀巴塞喺西甲爭標路上陷於苦戰，耗力甚大，球員踢到躁，難怪上場西甲0比2輸畀馬拉加，尼馬被逐後，仲向球證做諷刺手勢，佢隨時被加重處罰，難免影響士氣。
球證馬斯歷克再做巴塞凶星
事實上，正如祖記中堅邦路斯所講，現時巴塞比兩年前弱，除咗「MSN」威力有所下降之外，作客表現更急插水，近5場作客輸咗3場，包括歐聯16強首回合作客慘吞巴黎聖日耳門4蛋，更唔好彩係該場球證馬斯歷克將會主吹今場大戰，巴塞球員再見到佢，都咪話唔心寒。
巴塞仲有一個不利因素，就係布斯基斯停賽，呢位西班牙國腳一直係球隊防中必然正選，全靠佢不遺餘力喺中場掃蕩，其他中前場球星先至可以專心進攻，基本上冇人可以代替佢嘅位置。教練安歷基好可能要將中堅馬斯真蘭奴推前客串防中，牽一髮動全身，希古恩正好趁機騷哥利。