摩納哥實力曝光難偷雞
周三凌晨歐聯8強首回合，由「蜜蜂兵團」多蒙特主場迎戰法甲「1哥」摩納哥。作客嘅摩納哥雖然喺16強淘汰英超勁旅曼城，但實力已經全面曝光，尤其是之前仲未咁為人熟識嘅「新亨利」基利安洛天已經爆紅，各大豪門對呢支神奇球隊有晒戒心，況且摩納哥今仗殘陣出擊，好難再有機會出奇制勝，今仗工廠仔熱捧1.53倍主W。
（有線62及202台周三凌晨2時45分直播）
守將傷停 摩軍唔易捱
摩納哥近兩季新人輩出，表現亦突飛猛進，不過名氣仍然未去到歐洲頂尖，即使喺今屆歐聯分組賽首名出線，亦因為同組對手實力唔強而未受其他球隊重視，直至16強絕地反擊淘汰曼城，突然間成為全歐洲熱捧新勢力，以基利安洛天為首嘅幾位新星成為豪門瘋搶目標，相信多蒙特今仗肯定會非常謹慎應戰。
事實上，摩納哥球員年齡較輕，承受壓力及經驗方面肯定輸蝕；月初法聯盃決賽就以1比4慘敗喺巴黎聖日耳門腳下。再者，摩納哥今仗陣容不整，防守中場泰莫爾巴卡約高停賽，正選右閘迪積比爾薛迪比亦喺上場聯賽重創入院，今仗好大機會缺陣，防線勢必出現重大漏洞。
蜜蜂兵團 歐戰主場醒神
另一邊廂，多蒙特要爭德甲冠軍機會已非常渺茫，目前只剩德國盃同歐聯可爭逐，因此今仗必定精銳盡出，除射手奧巴美揚腳風奇順，日本中場香川真司亦有回勇迹象，可彌補馬高列奧斯因傷缺陣空缺，況且「蜜蜂兵團」喺歐洲賽主場出擊特醒，連同今屆歐聯同上屆歐霸在內，該隊近12仗歐洲賽主場錄得9勝2和1負佳績，預計今仗可望先拔頭籌，主勝有計。