周二晚亞冠盃第4輪分組賽爆發兩場中、日大戰，其中F組浦和紅鑽將於主場迎戰分組賽3戰全勝嘅上海SP。紅鑽今仗贏波便可追至與對手同分，以佢哋今季喺各項賽事4次主場出擊全勝兼轟入19球嘅氣勢，加上近4次迎戰中超球隊取得3勝1和嘅對賽優勢，有力打破對手今屆不敗身，1.8倍主W捧得過。
（Now 671及Fox Sports Play周二晚6時30分直播）
浦和紅鑽上輪作客上海SP輸2比3，現以3分落後上海SP，不過今仗紅鑽只要贏波便可追至與對手同分，爭奪首名出線仲有價講。紅鑽上仗聯賽以7比0大炒仙台維加泰，連同聯賽及亞冠盃在內，今季4次喺主場出戰全部贏晒，而且4仗共入19球，每仗至少入3球，進攻火力驚人。紅鑽近年喺亞冠盃主場對中超球隊特別有計，對上4次主場出擊取得3勝1和，包括兩次擊敗中超擂台躉廣州恒大，表現充滿說服力。相反上海SP作客表現唔算太穩定，雖然佢哋今屆分組賽贏過南韓代表FC首爾，不過上海SP喺上屆亞冠盃踢咗5仗作客輸4仗，今次面對主場威力十足嘅紅鑽唔太樂觀。
江蘇鬥飛腳大盤好路
至於另一仗中日對決，FC江蘇會喺H組主場迎戰大阪飛腳。FC江蘇同上海SP一樣分組賽3戰全勝，暫以9分於H組領導群雄。FC江蘇陣中嘅巴西前鋒阿歷士泰斯拿同拉美利斯，喺今屆亞冠盃賽事已各入2球，質素超晒班。飛腳目前喺H組只排第3，想保持出線希望一定要搶攻，不過佢哋近7仗比賽只有1仗冇失波，防線唔算太穩健，今場捧中位數2.5球嘅大盤更好路。
（Now 670及Fox Sports Play周二晚7時35分直播）