師傅出招教訓徒弟
歐聯8強首回合爆發「冠軍前哨戰」，德甲班霸拜仁慕尼黑主場迎戰衞冕嘅西甲雄師皇家馬德里，今仗亦係兩軍主帥安察洛堤同施丹嘅師徒對決。拜仁教頭「肥安」乃皇馬2014年實現「歐聯10冠」嘅功勳主帥，對「銀河艦隊」瞭如指掌，今仗倒戈要報當年被炒魷屈辱，必定施展畢生功力，拜仁喺幾近無敵嘅主場有望先聲奪人，1.6倍主勝抵玩！
（有線61、64、201及203台周四凌晨2時45分直播）
皇馬自02年第9度捧歐聯後，苦等第10冠多年，直至13/14球季由「肥安」安察洛堤上任，並委任法國宿將施丹做助手，當季兩人夾手夾腳率領皇馬喺決賽贏馬體會，一圓歐聯10冠美夢。可惜好景不常，1季後「肥安」未有因奪歐超盃、世冠盃而獲得信任，反而因下半季喺聯賽及歐聯接連失利被炒魷，今仗咁蹺對番已經坐正嘅徒弟施丹，梗係出招教訓徒弟兼報仇啦！
拜仁歐聯主場戰績超勁
拜仁今仗雖然有門將紐亞、中堅曉姆斯同前鋒湯馬士梅拿受傷，不過呢支德甲勁旅主場戰績太勁，近16仗歐聯主場出擊，居然獲15勝1和超勁戰績，數番上次歐聯主場輸波，咁啱就係2014年4月慘吞由「肥安」領軍嘅皇馬4蛋，如今連「剋星教頭」都收歸旗下，要喺安聯球場演復仇戰砌低「銀河艦隊」並唔係太難。
皇馬缺兩鐵衞中門大開
皇家馬德里本身都有傷兵問題，中堅華拉尼傷患仲未康復，上仗聯賽仲傷埋葡萄牙中堅比比，冇咗兩大硬漢鎮守中路，皇馬防線都幾令人擔心。雖然施丹上季中途接手皇馬後，帶領球隊第11度歐聯封王，但佢注重突擊嘅戰術過於單調，遇上曾3奪歐聯嘅師傅「肥安」，經驗肯定不足，加上自改制後，歐聯從未有球隊可以蟬聯冠軍，施丹要打破魔咒更加係難上加難。