首回合防「狐狸」作客入球
歐聯8強首回合上演「新鮮戲碼」，馬德里體育會主場對李斯特城，表面上馬體會抽到好籤，但「狐狸」換帥後，已全面復甦，上圈正係淘汰西甲球隊西維爾，相信馬體會教練施蒙尼都唔敢輕敵，應會沿用以往踢歐聯淘汰賽嘅穩健戰術。李城始終係歐聯新丁，作客力求不敗已收貨，唔會同主隊硬碰，最好揀中位數2.5球嘅1.9倍入球細。
（有線62及202台周四凌晨2時45分直播）
馬體會能夠喺過去3屆歐聯兩次入決賽，最主要原因係防守出色，近8場歐聯淘汰賽主場出擊，即使僅獲4勝4和入5球，但卻可保持不失球，全部總入球都係2球或以下，包括上屆贏巴塞2比0及小勝拜仁慕尼黑1比0。
施蒙尼至叻穩健戰術
「床單兵團」能夠有咁標青成績，皆因教練施蒙尼深明如果主場被對手取得作客入球，就會後患無窮，所以寧願唔入波，都要力保不失球，甚至前鋒基沙文往往都要積極做逼搶，由前場開始破壞對手組織。加上施蒙尼眼見西維爾16強首回合畀「狐狸」取得作客入球，為出局埋下伏線後，今仗應會嚴密防守，保持清白之身，避免步西維爾後塵。
至於李斯特城2月尾炒咗雲尼亞里，改由格力沙士比亞領軍後，恢復「神奇球隊」本色，一度取得6連勝，直至上仗英超輸畀愛華頓，先至斷纜，證明「狐狸」人腳質素冇問題。李城打入8強，相信會比之前謹慎，畢竟嚟到呢個階段非常難得，絕對唔想因一時錯漏而功虧一簣，尤其係只要首回合作客唔輸，次回合返主場，晉級機會就大增，預料李城會全力施「守」術，頂住對手攻勢。