嚟緊英超砌「車」要留力
今晚歐霸8強首回合，大熱門曼聯作客硬撼比利時「山寨王」安德列治。由於曼聯嚟緊聯賽仲要大戰車路士，關乎爭前4命運，加上今仗只係首回合，並非生死關頭，以主帥莫連奴性格留力唔奇，安德列治實力有限，遇強唔會亂攻，中位數2.5球嘅入球細有1.77倍屬最佳選擇。
（Now 670及Fox Sports Play周五凌晨3時05分直播）
現時曼聯處於一種兩難局面，佢哋依家聯賽排第5，打少1場下落後「4哥」曼城4分，仲有機會後上以前4完成賽季，搶得來屆歐聯入場券，但若然集中火力喺歐霸封王，同樣可獲參加下屆歐聯資格，究竟點樣取捨呢，相信都幾考起主帥莫連奴，但始終依家兩邊都仲有機會，「寸王」唔會咁蠢，將所有雞蛋淨係放喺1個籃，因此聯賽同歐霸兩條戰線都唔會放棄住。
曼聯嚟緊周日英超要硬撼「1哥」車仔，對爭入前4影響甚大，相比之下，今晚歐霸8強作客對安德列治始終係首回合，就算有乜依郁，下周中返主場踢次回合仲有得追，點計都唔及對車仔一仗咁重要，莫連奴今仗略作保留亦可理解，就算收起伊巴謙莫域、保羅普巴等主力都唔奇。由於係客場出擊，加上仲有菲爾鍾斯、基斯史摩寧及桑馬達等傷兵，「寸王」今仗唔輸都收貨，返到主場先贏波都未遲，相信會排出比較保守嘅戰術。
安德列治上兩圈主場全細
另一邊廂，安德列治上兩圈喺歐霸淘汰賽擊退辛尼特及尼科西亞，兩回合共4場波有3仗總入球只達兩球或以下，以中位數2.5球計，其中兩仗主場都開細盤，今仗遇勁旅曼聯更加唔敢輕舉妄動，唔慌多波入，捧入球細最好路。