歐霸8強首回合另一場大戰，荷甲勁旅阿積士主場迎戰德甲史浩克04。阿積士能夠進身8強，全靠主場威力，佢哋近5次歐霸盃主場出擊，全部贏晒之餘仲只係失1球，表現無懈可擊。正因為阿積士呈現「主強客弱」特性，今仗更加會好好把握地利優勢全力爭勝，以免次回合作客將陷入困局，一於博阿積士2.5倍主勝。
（Now Fox Sports Play周五凌晨3時05分直播）
阿積士喺歐霸分組賽入面，4場勝仗有3仗嚟自主場，而對上2圈淘汰賽都係作客處於劣勢，全靠主場贏波晉級，好似32強作客畀歷基亞悶和0比0，次回合主場就贏1比0；16強首回合作客1比2不敵哥本哈根，到返主場贏2比0先至晉級。阿積士今圈先踢主場賽事，肯定想先發制人贏波，盡量爭取多啲籌碼迎接次回合作客史浩克。
史浩克04作客唔掂
作客嘅史浩克04上一圈僅憑較多作客入球淘汰同國球隊慕遜加柏，晉級過程非常驚險。事實上，呢支德甲球隊作客成績唔多掂，對上一仗喺德甲作客吞雲達不來梅3蛋，近6仗正式賽事客戰，只獲得1勝2和3負，3場敗仗都輸2球或以上，今仗前景絕不樂觀。