潛艇上盤過關佳品
今晚雖然有荷乙、英冠同英甲快車賽事，但阿King就睇中咗西甲場獨腳戲，由艾拉維斯主場對維拉利爾。艾拉維斯近期冇咗季初嘅氣勢，聯賽表現有啲走下坡，加上有幾位主力缺陣，面對近況回勇嘅「黃色潛艇」維拉利爾，就算有主場之利都難佔甜頭，讓球盤維拉利爾小讓平半，阿King推介上盤。
(Now 632周二凌晨2時45分直播)
艾拉維斯係今季升班「新丁」，季初曾經作客贏過巴塞隆拿令球迷印象深刻，其後表現亦頗為平穩，甚少出現連場敗北嘅情況。不過，艾拉維斯近期狀態明顯跌Watt，最近3場聯賽輸晒之餘仲1球都入唔到，明顯陷入攻不銳守不穩嘅困境，加上後衞恩拿加里利亞同前鋒魯賓蘇利奴繼續唔出得，今仗要成功止跌難度甚高。
「黃色潛艇」維拉利爾現時排聯賽第5，球隊仍有機會爭取打入前4參加來季歐聯賽事，所以餘下賽事一定會搏盡。維拉利爾早前曾遭逢兩連敗嘅小低潮，幸好球隊及時振作，近兩場聯賽皆順利贏波重拾狀態。「黃色潛艇」今仗仍有門將沙治奧阿辛祖、後衞魯卡維拿同中場卓利舒夫因傷缺陣，但1月加盟嘅前鋒阿祖安盧比斯連續兩場聯賽有波入，弗到冇朋友，今仗有望攻破態沉嘅艾拉維斯。
串斯特拉斯堡國民隊
其餘賽事方面，法乙斯特拉斯堡正力爭升班，球隊近6仗主場錄得5勝1負嘅成績，面對上仗狂失6球嘅阿些斯奧，今仗有望再贏。（周二凌晨2時45分開賽）。而葡超國民隊上仗打破連續14場未贏過嘅頹勢，士氣大振，主場有望擊敗近10仗客戰輸8場嘅摩里倫斯。
(周二凌晨3時開賽)