今季西甲爭標最關鍵一戰，終於來臨，「國家打吡」皇家馬德里主場對巴塞隆拿！兩隊上周中歐聯命運各異，皇馬苦戰之下加時贏波驚險晉級，巴塞遭祖記零封出局，唯一相同係雙方都搏到殘。皇馬踢足120分鐘，未必回得切氣，而且領先巴塞3分，兼踢少1場，今仗唔輸已有着數，唔會冒進。至於巴塞球王美斯已連續6場「國家打吡」食白果，拍檔尼馬又停賽，攻力打折扣，中位數3.5球嘅入球細有1.7倍值博。
（Now 632周一凌晨2時45分直播）
皇馬上周中歐聯8強次回合可以加時反勝拜仁慕尼黑，唔多唔少受惠於球證誤判，包括將拜仁中場維達爾趕出場，C朗入波越位，又睇唔到。「銀河艦隊」晉級4強，唔止欠缺說服力，亦肯定因為呢場惡鬥，消耗大量體力，匆匆再戰巴塞，認真惡啃，想贏亦有心無力。
皇馬歐聯激鬥未回氣
事實上，皇馬今場和波已經向冠軍行近一大步，因為繼續領先巴塞3分之餘，只要贏埋補賽，就可以拋離至6分，因此皇馬今場心態上難免傾向保守。有消息指，加里夫巴利已復操，但估計未必上陣，BBC人腳唔齊，切勿高估皇馬入波能力。
另一邊廂，巴塞就真係非勝不可，但「地上最強」現時問題多多，尼馬因為對馬拉加，向球證做出諷刺手勢，被追加停賽，無緣今場大戰。雖然巴塞拖延至前日向體育仲裁法庭提出上訴，博法庭唔夠時間處理，令尼馬暫時以「無罪」身份上陣，但西班牙傳媒話巴塞成功機會好低，呢條「奸計」難以得逞。
打吡戰美斯慣性「隱形」
其實就算尼馬有份踢，幫助亦唔大，事關巴塞近6場作客輸4場，包括歐聯吞巴黎聖日耳門4蛋，0比3輸畀祖雲達斯，甚至輸畀拉科魯尼亞同馬拉加，真係失禮。值得一提，原來美斯近6場「國家打吡」都冇波入，到時如果連呢位精神領袖都冇料到，恐怕冇球員可以拯救到巴塞，去到巴拿貝球場，隨時又被零封。