今晚阿仙奴同曼城，將會喺中立場溫布萊合演英格蘭足總盃4強賽事！兩隊4月初時先喺英超聯賽交過手，當時雙方表現不相伯仲，最終以2比2打成平手。今晚嚟到淘汰賽，相信佢哋嘅攻力一定有增無減，戰意更加激昂，預料兩隊將會攜手合演一場「入球騷」，心水推介3.5球嘅入球大。
（LeSportsHK應用程式周日晚10時直播）
A山係英超作客入波王
阿仙奴啱啱喺星期一英超聯賽對戰下游球隊米杜士堡，憑住阿歷斯山齊士（A山）同埋「大眼仔」奧斯爾兩大主力上、下半場各建一功，以2比1險勝對手，全取3分，保住前4希望。山齊士更攻入個人今季英超第13個作客入球，冠絕其他英超球員，絕對係名副其實嘅「作客王」呀！而呢場比賽其中一大焦點，就係領隊雲格竟然排出一條3人防線，係雲帥20年嚟嘅第一次！早前喺對曼城呢場比賽嘅記者會上，雲格就話今晚呢場大戰可觀性非常之高，希望兵工廠可以拎到首個入球，仲話3人防線令球隊後防更加穩定，皆因阿仙奴最近失波多，近8場比賽場場開大，失波仲多過入波！既然上場用「3人防線」呢招使得，相信今晚雲帥好大機會照辦煮碗！
阿古路今季39場入29球
另邊廂，養傷11個月、自從上年5月只上陣過8場比賽嘅曼城隊長高柏尼已經傷愈復出，喺上場英超踢足90分鐘都無問題，狀態逐步提升，上仗更為球隊頂入一球打開紀錄，協助曼城大炒修咸頓3比0。就連領隊哥迪奧拿賽後都大讚隊長交出表現，係一位真真正正嘅領袖中堅，有佢上陣嘅比賽可以穩定軍心。另外，王牌射手阿古路開季至今為藍月亮上陣39次，合共攻入29球，入波效率極高！最近外界盛傳阿古路下季會離開曼城轉投皇馬，如果傳聞屬實，相信阿古路一定大踢身價波！況且雙方上一次交手就係4月2日嘅英超聯賽，當時兩隊互有攻守，最終踢成2比2和氣收場。但喺今晚嘅4強戰就一定要分出勝負，相信佢哋為咗爭入決賽，一定會鬥到難分難解，入波又點會少！入球大細中位數3.5球，入球大絕對係信心之選。