上周五凌晨曼聯力爭入歐霸4強，「瑞典戰神」伊巴謙莫域完場前由於落地落得唔好，拗到膝頭令右腳重創。據意大利知名記者Di Marzio爆料，指「伊巴」膝頭前、後兩條韌帶均有撕裂現象，做完手術後要抖9個月，最快都要明年1月先可以復出。「伊巴」到時已經36歲，紅魔或者會被迫放棄呢位老將，勢估唔到歐霸主場對安德列治一仗，可能係「伊巴」最後一次為曼聯上陣！
「伊巴」職業生涯絕少出現大傷，估唔到去到尾段先遇到重大挫折，佢今季表現一流，已經射入28球，領隊莫連奴極希望同「伊巴」簽多一年約。不過，「伊巴」要抖成9個月，據稱紅魔已暫時擱置續約單嘢。
莫帥除門將得16球員可用
除咗「伊巴」重傷抖9個月外，曼聯嘅阿根廷後衞馬高斯盧祖亦因左膝韌帶拉傷，需要做手術，預計將缺席今季餘下所有賽事。紅魔一日內冇咗兩員主將，加上長期缺陣嘅桑馬達、基斯史摩寧同菲爾鍾斯，令球隊陷入嚴重傷病潮。
般尼近10仗全開半場和
事實上，曼聯在接下來31日內需要踢9場賽事，而莫連奴手上除門將外，現時只有16名球員可用，惟有從預備隊拉兩個小將上來才能湊齊18人名單。紅魔今晚喺英超作客鬥般尼，球隊剛喺歐霸搏足120分鐘先過關，未回得切氣加上兵源緊絀，初段相信會穩打穩紮，加上般尼主場戰績唔曳，而且佢哋近10場波都開出半場和，今仗一於再追！
（Now 621及LeSports HK應用程式周日晚9時15分直播）