和波就掂Vs有心無力
亞冠盃第5輪分組賽，G組南韓代表水原藍翼今晚主場迎戰日職球隊川崎前鋒。藍翼今場只需和波便肯定取得其中一個出線席位，主場出擊唔使同你急；前鋒形勢上想出線今仗非勝不可，不過球隊今屆4場分組賽只入3球，而且今場傷兵滿營，想入波恐怕有心無力，2.5球嘅細盤捧得過。
（Now 670及Now Fox Sports Play周二晚6時直播）
G組除咗本港代表東方龍獅，其餘3隊都未輸過波，水原藍翼暫時以8分排榜首，領先前鋒4分，藍翼今仗只需多取1分，就算最後一輪輸畀FC廣州，排名上都肯定可以壓過前鋒，取得其中1個出線資格，所以今仗大前提係唔好失波。強如FC廣州今屆作客藍翼都只係和波，如果藍翼專心防守，攞1分應不難達標，預計踢法會先求穩陣，唔介意踢場悶戰。
川崎前鋒攻擊力不足
由於FC廣州今輪好大機會擊敗實力最弱嘅東方龍獅，川崎前鋒想出線一定要贏波，不過球隊今屆4場分組賽只入3球，全部總入球皆在2球或以下，尤其作客面對東方亦只能打和1比1，攻擊力嚴重不足，而且球隊目前陣中有唔少傷兵，包括中場家長昭博、武岡優斗、田中碧、大島僚太及後衞艾辛奴費拉拿、杜度、井川祐輔皆負傷在身，戰鬥力大跌，預計今場入波唔會多，捧2.5球嘅細盤最穩陣。
飛腳回勇同阿聯駁火
另一支日職代表大阪飛腳會喺H組主場迎戰澳職阿德萊德聯。呢組除咗4戰全勝嘅FC江蘇穩奪首名出線資格，其餘3隊差距只有1分，仲有機會爭出線。飛腳上場聯賽大炒大宮松鼠6比0，進攻火力返晒嚟，而且飛腳今屆分組賽唯一贏波就係作客3比0大勝阿德萊德聯，心理上有優勢，為保出線機會，今仗一定繼續搶攻。
阿德萊德聯無緣澳職季後賽，可專心應付亞冠盃，球隊對上3仗分組賽合共轟入7球，但失球亦多達6個，而且如果阿德萊德聯今仗贏波，同時間濟州聯不敵FC江蘇，阿德萊德聯肯定以較佳對賽成績壓過濟州聯，直接取得出線資格，作客一樣照搶攻，呢場捧3/3.5球嘅大盤最划算。
（Now 672及Now Fox Sports Play周二晚6時直播）