猛將蓄銳 不容再失
今晚英超補賽獨腳戲，「1哥」車路士主場迎戰「聖人」修咸頓。車仔畀次席熱刺愈追愈近，榜首地位出現危機，今仗不容再失，啱啱英足盃晉級信心返晒嚟之餘，主力夏薩特及迪亞高哥斯達只係打咗半場都冇，抖到夠勢必「蜂冚」修咸頓，車仔主場讓1/1.5，揀上盤。
（Now 621及LeSports HK應用程式周三凌晨2時45分直播）
車仔近4仗聯賽輸掉2仗，依家只領先連場報捷嘅熱刺4分，令聯賽冠軍之爭再生懸念，為保榜首地位，必趁主場之利盡力搶分。
修咸頓遇強即腳軟
踢波嘅嘢有起有跌，車仔日前喺英足盃4強惡鬥勁敵熱刺，主帥干地大膽正選收起夏薩特及迪亞高哥斯達等主力，起用韋利安、巴舒亞伊及尼敦阿基等副選，佢哋亦交到貨，韋利安更省2粒，而夏薩特同「迪哥」下半場中段入替亦扭轉乾坤，「夏神」仲有波入添，協助車仔贏4比2殺入決賽重拾信心，兼且可挫一挫熱刺銳氣。查實「夏神」同「迪哥」上仗踢咗半場都冇，干地明顯係想佢哋留力打好今仗，尤其係夏薩特喺主場演出特別sharp醒，佢今季聯賽有14個士哥，其中有10粒於自己地頭史丹福橋球場取得，勇不可當。
另一邊廂，修咸頓自2月尾失落英聯盃冠軍後，既冇護級壓力又冇乜機會爭踢歐洲賽，表現開始反覆不定，近6仗聯賽只獲3勝1和2負，由於續有中堅華基爾雲迪積克養傷，焗用吉田麻也拍住積克史提芬斯，呢6仗合共失咗9粒，認真唔穩陣。再睇埋「聖人」近5次作客如熱刺、曼聯等前7球隊，僅獲1和4負，明顯作客遇強即腳仔軟，造訪近12仗聯賽主場贏11仗、有8仗贏2球或以上嘅車仔，凶多吉少，一於捧車仔上盤。