另一支倫敦勁旅熱刺今輪「倫敦打吡」作客水晶宮，主隊水晶宮近期堪稱「巨人殺手」，先後擊敗車路士、阿仙奴同利物浦，絕對唔嘢小。而且熱刺剛於上仗足總盃4強輸畀車路士，8連勝走勢斷纜，難免打擊士氣，呢支「英超二哥」讓波有暗湧，捧2.25倍嘅水晶宮讓球主勝。
（Now 621及LeSports HK應用程式周四凌晨3時直播）
熱刺作客贏波率低
水晶宮上年12月尾改由「護級專家」艾拿戴斯執教，經過一輪調整後即時大翻身，近8仗聯賽6勝1和1負，最犀利係贏過3支前列勁旅車路士、阿仙奴同利物浦，證明「大Sam」教中小型班確有一手。連帶前鋒賓迪基亦回勇，近5場聯賽轟入5球，包括上仗倒戈對利物浦梅開二度，狀態弗爆，將帥上下一心愈踢愈有信心，主場鬥「二哥」熱刺都未驚過。
未計昨晚賽事，熱刺落後榜首車仔4分，仲有得追，問題係球隊剛於足總盃4強輸2比4畀車仔淘汰，熱刺被一盤冷水照頭淋，隨時動搖埋聯賽爭標信心。加上熱刺今季聯賽作客勝率只有40%，仲低過阿仙奴，甚至只能作客同包尾嘅新特蘭打和0比0，今仗面對大勇嘅水晶宮讓球牙煙，不宜高估。