德盃冤家近3對賽難分高下
今晚德國盃4強爆發重量級國家打吡，衞冕嘅拜仁慕尼黑主場火併「蜜蜂兵團」多蒙特。兩隊都喺歐聯出局，而拜仁喺聯賽又放到甩轆，多蒙特今季奪標希望剩餘德盃，必定搏甩髀，加上近3次德盃交鋒法定時間都未分高下，今場受讓一球必捧「蜜蜂兵團」下盤。
（無綫翡翠台及TVB 13周四凌晨2時45分直播）
拜仁與多蒙特皆於歐聯8強被淘汰，現時只能專心國內賽事，但睇番聯賽拜仁已領先「2哥」RB萊比錫8分，捧盃只係時間問題，因此多蒙特若果想今季有盃落袋，如今只剩番德國盃，因此戰意唔使懷疑。多蒙特日前聯賽反勝慕遜加柏3比2，一吐歐聯出局嘅烏氣，尤其係傷愈復出冇耐嘅馬高列奧斯，連續3仗有波入，弗到漏油，呢位型仔揚言隊友紐尼沙軒受傷唔出得都冇有怕，仲話「蜜蜂兵團」成隊信心返晒嚟，誓要擊敗強敵拜仁殺入決賽。
蜜蜂兵團受讓抵捧
另一邊廂，拜仁梗係想力爭做國內雙冠王喇，不過從日前聯賽逼和緬恩斯2比2嚟睇，似乎佢哋仍未走出歐聯出局嘅陰霾，加上陣中有左閘阿拉巴傷出，今仗肯定唔使預佢，而門神紐亞亦提早收咧，兩大中堅曉姆斯及謝路美保定一直以來帶傷上陣，而中場悍將維達爾嘅妹夫日前於智利遭槍殺身亡，雖然佢堅持備戰德盃，冇陪家人返智利處理妹夫身後事，但心情難免受到影響，既然咁多隱憂，拜仁主帥安察洛堤定必先求穩陣。
連今屆比賽在內，呢對死敵已經連續4屆於德盃碰頭，之前3次喺德盃交手，法定時間內全部打和，證明佢哋喺1場過嘅淘汰賽對壘都會小心翼翼，預計今仗喺法定時間未必能分出高下，讓球盤多蒙特仲有得受讓一球咁筍，下盤不容錯過。