法足盃4強上演重量級大戰，巴黎聖日耳門（PSG）主場迎戰摩納哥；兩軍今季由頭鬥到尾，PSG早前喺法聯盃決賽大勝4比1先拔頭籌；摩納哥近年作客PSG往績佳，為報一箭之仇，就算作客亦唔會死守。雙方陣中都有唔少攻擊好手，喺一場過嘅淘汰賽場合，預計會同上次一樣出現大手交易，3.5球大盤博得過。
（TVB 303周四凌晨3時05分直播）
PSG同摩納哥今季喺國內3大錦標由頭鬥到尾，聯賽依家兩隊同分未知鹿死誰手，之前法聯盃決賽PSG贏波先下一城；由於法足盃另一場準決賽由昂熱鬥甘岡，實力上同兩大勁旅有明顯分野，所以今場邊隊贏波，捧盃機會高唱入雲，名副其實係冠軍前哨戰。上次法聯盃決賽摩納哥雖然慘敗1比4，不過嗰場比賽法卡奧因傷未有披甲，而且經過歐聯8強淘汰多蒙特，摩納哥依家士氣及信心比起上次交手有過之而無不及，特別係19歲小將基利安洛天近期愈戰愈勇，近4仗比賽個人轟入4球，勢成PSG防線心腹大患。連同聯賽及盃賽在內，摩納哥對上9次作客PSG只係輸過1次，往績唔失禮，憑佢哋強大火力有權以攻代守。
聖日耳門晒冷還擊
當然，主隊PSG嘅攻力亦唔需要懷疑，烏拉圭射手卡雲尼今季喺各項賽事個人攻入44球，包括上次法聯盃決賽梅開二度，早前受傷患困擾嘅德國中場達斯拿上場聯賽亦後備登場，加埋迪馬利亞、馬度迪及馬高華拉堤等好手，PSG嘅進攻火力亦唔比摩納哥遜色。既然今場一場過決勝負，只要打破缺口，入波隨時陸續有來，如果嫌中位數2.5球嘅大盤太熱，不妨轉捧3.5球嘅入球大。