亞冠盃Ｆ組賽事，中超豪門上海SP（上海上港）、日職勁旅浦和紅鑽今晚分途出擊，兩隊今輪和波就可以出線，爭勝戰意成疑，其中上海SP主場迎戰南韓球隊FC首爾，讓波更加制唔過，事關上海SP近期運滯，球星奧斯卡杜斯山度士上輪亞冠盃射失兩球12碼，非常失禮。FC首爾話晒係2013年亞冠盃亞軍，爛船始終有三斤釘，背水一戰必定搏命，受讓半一，下盤可取。
（Now 671及Fox Sports Play周三晚7時30分直播）
包括聯賽及亞冠盃在內，上海SP曾取得開季6連勝，但自從月初喺中超輸畀勁敵FC廣州（廣州恒大）後，信心似乎受到動搖，先是亞冠盃0比1不敵浦和紅鑽，接着聯賽打和天津權健。最離譜係對紅鑽，奧斯卡杜斯山度士竟然10分鐘內射失兩球12碼，成為輸波罪人。唔多唔少亦反映上海SP出線在望情況下，球員開始有所鬆懈，小心佢哋又玩嘢。
FC首爾今仗非勝不可，南韓球隊一向以鬥志頑強見稱，加上近5仗取得3勝2和，狀態有復甦迹象。而且FC首爾首循環僅以0比1不敵上海SP，眼見對手近期表現走下坡，FC首爾應該唔會再輸。
紅鑽「細」迎流浪者
同組另一場，浦和紅鑽主場對西悉尼流浪者，紅鑽都係和波就可以出線，仲要讓球半／兩球，未免太辣。西悉尼流浪者上仗澳職季後賽激戰120分鐘後，互射12碼出局，非常打擊士氣，最好揀中位數3.5球嘅入球細。
（Now 672及Fox Sports Play周三晚6時30分直播）