雙方變陣火力提升
窮則變、變則通！今晚深夜英超阿仙奴主場鬥李斯特城，兩隊近期先後作出變革，令成績顯著提升。「狐狸」換帥後表現反彈，射手占美華迪全面翻生；阿仙奴近兩仗轉踢「３４３」後亦重現生氣，為保前４希望主場出擊必搶攻，今仗隨時出現大手交易，中位數３／3.5球嘅大盤有1.95倍值得支持。
（Now 622及LeSports HK應用程式周四凌晨2時45分直播）
阿仙奴今季成績麻麻，領隊雲格唔變唔得，近期改踢「３４３」陣式，明顯有心增強鋒力，先喺聯賽作客擊敗米杜士堡，上仗足總盃4強更踢至加時成功淘汰曼城入決賽，球隊上下回復信心，前鋒阿歷斯山齊士連續兩仗入波，新陣式明顯令呢位智利射手重現活力，加上奧斯爾、阿歷士張伯倫同韋碧克等攻擊主力上晒力，「兵工廠」火力唔使擔心。
3人防線仲有漏洞
不過阿仙奴嘅3人防線演練未達完美，由隊長哥斯尼、基比爾包列斯達同洛賀丁組成嘅3人防線，明顯未熟習新陣式，德國中堅梅斯達菲仍然養傷，焗住起用經驗不足嘅洛賀丁未能予人信心，睇番阿仙奴近6仗聯賽入9球失12球，防線明顯唔及以前咁穩陣，相信會以攻代守，配合近期全面提升嘅火力，阿仙奴今晚要取得入球唔係難事。
李斯特城自委任格力沙士比亞代替雲尼亞里掌舵後，演出脫胎換骨，歐聯8強出局雖敗猶榮，近7仗聯賽更係取得5勝1和1負強勁走勢，護級任務幾近完成，前線占美華迪同馬列斯全面復甦，今仗喺冇乜心理包袱下，或者會同主隊鬥攻，大盤不容錯過。