周五德甲獨腳戲利華古遜主場對史浩克04，兩軍級數相若，近季都以「挑戰歐聯，起碼歐霸」為目標，不過今季同樣失敗，目前排喺十名以外，尤其利華古遜上月初搵咗「好心人」泰亞芬哥古特執教後，表現同成績仲衰多二錢，會方目前首要工作係搵下季新帥，球員戰意一般，今晚主場讓唔起波，黑柴推介史浩克受讓平半嘅下盤。
（Now 670、有線61及201台周六凌晨2時30分直播）
利華上月初不敵多蒙特後，怒炒獲外界有好高期望嘅教練羅渣舒密特，搵泰亞芬哥古特頂上，仲講明係試用性質，如果球隊未能攞到下屆歐霸盃參賽資格，佢就要季尾走人，當時黑柴已批評呢個係錯誤決定，因為黑柴喺德國戰友Alwin Amler口中，已經知道呢個前賀芬咸U17教頭功力麻麻，佢只係出名好心人，經常幫助年輕球員解決家庭問題，似社工多過教練。結果佢上任至今，利華8戰僅得1勝4和3負，唯一勝仗係對已經篤定降班嘅達斯泰特，哥古特想攞歐霸參賽資格留低機會微乎其微，難怪最近連球會官網都少咗上載佢嘅講話，擺到明等球季完結就再度換帥。
史浩克受讓坐和望贏
哥古特最大問題係優柔寡斷，着重控球根本唔適合利華球員擅長嘅快速踢法，而且臨場調動極差，佢上任第一場聯賽主場對雲達不來梅，本來早早領先仲控制戰局，但竟然愈搓愈後等完場，結果畀不來梅老將比沙路後備入替扳平。球隊跟住全無起色，近期仲接連畀ＲＢ萊比錫同弗賴堡完場前絕殺，士氣大受打擊。史浩克近期成績都曳，但喺歐霸對阿積士出局只係相當失運，次回合整體表現出色，上輪聯賽面對萊比錫亦踢出拚勁逼和對手，鬥志同演出都獲好評，今仗面對大部分人抱收咧心態嘅利華，即使作客都有力坐和望贏。