今輪意甲頭炮，阿特蘭大主場對祖雲達斯，「斑馬兵團」將於香港時間下周四凌晨歐聯4強首回合作客摩納哥，理論上今仗聯賽應會留力，但祖記非常有「體育精神」，睇番紀錄，佢哋今屆歐聯前嘅聯賽全勝，以球隊目前勇態，足以輕取阿特蘭大，客W有1.98倍抵玩。
（TVB 302周六凌晨2時45分直播）
祖雲達斯喺意甲大超班，即使有歐聯後顧亦未驚過，佢哋今屆歐聯前，共10場聯賽都贏晒，包括擊敗拿玻里、AC米蘭及今場對手阿特蘭大。皆因教練阿里基唔熱衷玩輪換，最佳例子係歐聯8強次回合鬥巴塞隆拿前夕，就算聯賽對手只係弱隊佩斯卡拉，阿里基仍然派出希古恩、保羅戴巴拿、文迪蘇傑強陣搏殺，更何況今仗遇上第5位嘅阿特蘭大，相信祖記會更加認真爭勝。
阿特蘭大對賽輸晒
阿特蘭大現時排名竟然高過米蘭雙雄，的確令人驚喜，但整體實力始終唔可以同祖記相提並論。今季聯賽首循環作客1比3不敵祖雲達斯，雙方喺意大利盃交鋒，阿特蘭大再輸2比3。再睇遠啲，原來兩隊近14次對賽，阿特蘭大全敗收場，根本冇得同祖記鬥，一於捧「斑馬兵團」再下一城。