歐聯交鋒例牌少交收
歐聯4強首回合率先上演「馬德里打吡」，皇家馬德里主場迎戰馬德里體育會！包括上屆決賽，雙方將連續4屆歐聯對碰，之前3屆共4次交鋒，都係雷聲大雨點小，法定時間90分鐘入波1球起、2球止，以中位數2.5球計，全部開細。加上皇馬射手C朗今屆歐聯腳風唔順，拍檔加里夫巴利養傷，面對馬體會穩健防線，好難入到波。馬體會教練施蒙尼戰術保守，作客唔會冒進，一於再追中位數2.5球入球細。
（有線61、64、201及203台周三凌晨2時45分直播）
雖然皇馬今仗有地利，但臨近季尾，球隊顯得力有不逮，歐聯8強次回合主場法定時間90分鐘輸畀拜仁慕尼黑，全靠加時反勝，而且該仗球證有多次錯判，令皇馬受惠。之後西甲再喺巴拿貝出擊，即不敵巴塞隆拿，上仗西甲同樣有地利，都要踢86分鐘先至靠馬些路攻入致勝1球，可見「銀河艦隊」狀態有走下坡迹象。
「銀河艦隊」搏到殘跌watt
皇馬「最大殺傷力武器」C朗上年捧完歐國盃後，入波數字明顯下降，今屆歐聯僅入7球，比美斯少4球，甚至低過16強出局嘅巴黎聖日耳門前鋒卡雲尼。相比C朗上屆轟入16球，有天壤之別。加上加里夫巴利受傷缺陣，賓施馬長期缺態，「BBC」鋒線瀕臨瓦解邊緣，攻力令人懷疑。
事實上，2014年及上屆決賽，皇馬同馬體會法定時間90分鐘都打成1比1，2015年8強兩回合，皇馬分別贏1比0及打和0比0，唔好期望今場會多波入。
馬體會專踢「悶蛋足球」
至於馬體會過去3屆歐聯，可以兩次入決賽，有賴於教練施蒙尼防反戰術，雖然欣賞指數低，但勝在奏效，今屆再將「悶蛋足球」發揮到極致。由分組賽至8強，合共10場比賽，有8場總入球係2球或以下。加上翼鋒恩歷克卡拉斯高受傷，上陣成疑，令施蒙尼進攻籌碼減少，隨時乾脆主守，希望力保不敗，等次回合返主場，再向「銀河艦隊」施展致命一擊。