西甲爭逐異常激烈，巴塞隆拿今晚「打吡戰」作客愛斯賓奴絕對唔易食。巴塞隆拿雖然成績同名氣都遠勝同市嘅愛斯賓奴，但係近年交鋒都佔唔到太大優勢，近5次作客愛斯賓奴得3勝2和，而且總入球都係2球或以下，揀中位數3.5球細盤最好不過。
（Now 632周日凌晨2時45分直播）
巴塞隆拿周中主場7比1狂數奧沙辛拿，今仗更有巴西球星尼馬復出，理應算勝更高。不過巴塞隆拿作客一向不穩，近期就作客輸過畀拉科魯尼亞同馬拉加2支下游球隊。如今巴塞隆拿只求拎足3分，就算小勝都係完美賽果，相信教練安歷基會特別小心，就算領先都唔會輕率進攻。
愛斯賓奴唔會大敗
愛斯賓奴守強攻弱，近5仗總入球都係2球或以下，包括0比1不敵馬德里體育會，佢哋今季2次對鋒力強橫嘅皇馬都只係小負0比2，而且今仗始終係「巴塞隆拿打吡」，被睇低一線嘅愛斯賓奴主場出擊，點都要踢爭氣波，愛斯賓奴上季主場力戰之下曾守和巴塞隆拿0比0，預料今仗就算輸波亦未必會大敗。