「一哥」抖夠夫添搏殺
今季澳職仲有最後3場就落幕，今日先嚟第1場準決賽，常規賽盟主FC悉尼抖咗十幾日、養精蓄銳下再出擊，佢對手就係珀斯光輝。論火力，兩隊都係今季聯賽最強，不過防守就差天共地喇！FC悉尼平均兩場都失唔到1球，光輝掉番轉一場失近2球！雙方咁大差距之下，今場絕對可以放心捧FC悉尼讓球主勝啦。
（有線64及203台周六下午5時50分直播）
FC悉尼以常規賽冠軍身份直入季後賽四強，上星期輪空，一班球員有得回吓氣再踢，連之前足踝受傷嘅中場靈魂人物連高域都已經好番，今場可以正選披甲。FC悉尼呢場可以「夫添」上陣，球員亦叉足晒電，可望發揮出最高水平啦，以FC悉尼今季主場10勝3和不敗佳績，要喺主場贏波晉級，真係冇乜難度。
珀斯光輝喺常規賽排第5位，按理佢哋應該喺第4位嘅墨爾本城之下，加上要作客，但嗰場淘汰賽佢哋突破心理終於贏出，球員信心應該唔錯。之不過，佢哋實力同今場對手FC悉尼根本唔同級數，光輝今季喺常規賽三鬥「一哥」，分別輸1比4、1比4同埋0比3，場場都畀FC悉尼大炒，今場未踢心理上已經輸咗一半先啦！
聽日等睇勝利炒起獅吼
另一場4強、墨爾本勝利主場迎戰布里斯班獅吼聽日至踢。常規賽亞軍墨爾本勝利同FC悉尼一樣上圈輪空，可以專心部署呢場波。相反，布里斯班獅吼上周驚險淘汰西悉尼流浪者後，周中「亞冠盃」遠征泰國又啃咗蒙通聯三蛋，體能同士氣都唔理想，今場作客信唔過，捧讓球主勝好路。
（有線64台周日下午3時直播）