下周中歐聯火併同市死敵
周中快車之後，西甲雙雄皇家馬德里同巴塞隆拿今晚又分途出擊。皇馬上仗起收起主力，仍然大炒拉科魯尼亞6比2，但今晚主場迎戰華倫西亞，恐怕未必可以再贏得咁輕鬆，事關「銀河艦隊」將於下周中歐聯4強首回合鬥馬體會，今場唔會踩得太盡，加上近8次鬥華倫，僅獲得2勝，而且呢2場勝仗都係贏得1球，皇馬讓兩球，寧博華倫西亞讓球客勝。
（Now 632周六晚10時15分直播）
皇馬喺「國家打吡」不敵巴塞隆拿後，因對賽成績較差，被同分嘅巴塞搶走榜首之位，但皇馬踢少1場，情況未算太壞，餘下5場只需4勝1和，就可以捧盃，並非完全冇失分空間。「銀河艦隊」最大後顧之憂係歐聯，下周中4強首回合對同市死敵馬體會，絕對難踢。因此，教練施丹今仗應該會要求球員就住踢，冇必要浪費體力大炒華倫。事實上，西甲同分先計對賽成績，皇馬就算贏多幾球，都冇着數，最緊要係穩陣攞齊3分。
其實皇馬上仗可以大炒拉科，主因係格食格，兩隊近9次交鋒，「銀河艦隊」全勝。不過，皇馬遇上華倫西亞，情況就相反，往往陷入苦戰，其中近8次對壘，皇馬只取得2勝4和2負，包括兩個月前輸1比2，而2場勝仗都係險勝3比2，皇馬今場讓兩球，實在太受高估。
華倫遇強屢有佳作
華倫西亞季中聘請禾路回巢領軍後，不時有佳作，除咗以2比1擊敗皇馬之外，亦打和西維爾0比0。對巴塞隆拿一役，即使華倫有半場時間踢少1人，都頂到89分鐘，先至輸2比4，雖敗不辱。「蝙蝠兵團」今仗客戰巴拿貝球場，有力同皇馬周旋到底。